Terfynu’r cyswllt awyr rhwng y gogledd a’r de – ein hymateb
Published: 8 Jun 2022
Mae’r contract gydag Eastern Airways i redeg cyswllt awyr rhwng y gogledd a’r de (rhwng meysydd awyr Ynys Môn a Chaerdydd) wedi bod yn fater dadleuol ers tro byd, a thros y blynyddoedd mae Cyfeillion y Ddaear Cymru a Democratiaid Rhyddfrydol Cymru wedi galw am ddod â’r cymhorthdal i ben.
Medd Bleddyn Lake, llefarydd ar ran Cyfeillion y Ddaear Cymru:
“Dyma gam mawr ymlaen yn y frwydr yn erbyn newid hinsawdd.
“Gwyddom o’r gorau pa mor niweidiol yw hedfan i’n planed. A phe bai Llywodraeth Cymru wedi penderfynu adnewyddu’r contract hwn a pharhau i roi cymorthdaliadau i’r nifer fechan o bobl a arferai fynd ar y daith fer hon, byddai hynny’n gwbl groes i’w hymrwymiadau o ran yr hinsawdd.
“Dyma’r penderfyniad iawn yn ddi-os, a chroesawn y penderfyniad i fuddsoddi’r arian hwn mewn trafnidiaeth gyhoeddus gynaliadwy yng ngogledd Cymru.”
Medd Jane Dodds, Aelod o’r Senedd ac Arweinydd Democratiaid Rhyddfrydol Cymru:
“Ers tro byd, mae Democratiaid Rhyddfrydol Cymru wedi galw am ddod â’r cymhorthdal i ben.
“Dyma swm sylweddol o arian cyhoeddus i’w wario ar adeg pan mae’r pandemig wedi newid y ffordd y gweithiwn, ac mae angen inni wneud popeth o fewn ein gallu i roi stop ar y niwed a wnawn i’n planed.
“Yn awr, rhaid i Lywodraeth Cymru fuddsoddi mewn cysylltiadau trafnidiaeth gyhoeddus a chysylltedd digidol yng ngogledd-orllewin Cymru er mwyn sicrhau y bydd modd i gymunedau ffynnu.”
Mae Cyfeillion y Ddaear wedi bod yn feirniadol ers tro bod Llywodraeth Cymru yn rhoi cymhorthdal i’r cyswllt awyr bach gogledd-de rhwng meysydd awyr Ynys Môn a Chaerdydd.
Gyda'r contract i fod i gael ei adnewyddu yn 2023, yn hydref 2021 fe wnaethom adnewyddu ein galwadau i atal y cymhorthdal. Gwnaethom gais Rhyddid Gwybodaeth a oedd yn dangos bod cyfanswm y cymhorthdal oedd ar gael i Eastern Airways hyd at £8,529,282.
Dangosodd Rhyddid Gwybodaeth hefyd, yn y flwyddyn lawn ddiwethaf cyn Covid (2019-2020), fod cyfanswm cymhorthdal o £1,981,191 wedi'i dalu i gludo 13,930 o deithwyr - cymhorthdal o £142.22 y pen
