Rhaid i gartrefi cynnes fod yn flaenoriaeth yng Nghymru

Yn ymateb i drafodaeth y Senedd ar adroddiad y Pwyllgor Cydraddoldeb a Chyfiawnder Cymdeithasol ar dlodi tanwydd a'r Rhaglen Cartrefi Clyd, dywedodd Haf Elgar, Cyfarwyddwr Cyfeillion y Ddaear Cymru:

“Ni ddylai pobl orfod wynebu dewisiadau amhosib fel p'un ai i brynu bwyd neu wresogi'r ty. Rhaid sicrhau cartref cynnes i bawb fod yn flaenoriaeth i Lywodraeth Cymru. 

“Mae'r cynnydd mewn prisiau ynni yn effeithio grwpiau bregus a phobl sy'n byw mewn tai heb insiwleiddio da fwyaf.

“Rhaid i ni daclo hyn gyda'r brys ac i'r raddfa mae'n ei haeddu - rydyn ni'n wyneb argyfwng hinsawdd yn ogystal ac argyfwng costau byw. Bydd gwella effeithlonrwydd ynni cartrefi yn lleihau biliau ac allyriadau carbon, gan greu gwaith mewn cymunedau ledled Cymru.

“Rydym yn galw ar Lywodraeth Cymru i gyflwyno rhaglen Cartrefi Clyd newydd sy'n fwy o faint, yn targedu'n ddoethach ac yn wyrddach, fel yr argymhellwyd gan y pwyllgor.”

Ymatebodd Cyfeillion y Ddaear Cymru i ymgynghoriad Llywodraeth Cymru ar y rhaglen Cartrefi Clyd yn gynharach eleni.