Cefnogaeth gref ymhlith y cyhoedd i raglen cartrefi clyd uchelgeisiol
Published: 31 Mar 2023
Mae pobl yng Nghymru yn cael anhawster i dalu eu biliau ynni. Mae’r argyfwng ynni yn effeithio mwy arnom ni nag ar rannau eraill o’r DU, yn rhannol oherwydd ein cartrefi – gan fod ynni yn dianc trwy doeau heb eu hinswleiddio, trwy waliau a thrwy ffenestri.
Disgwylir i Julie James, y Gweinidog Newid Hinsawdd, wneud cyhoeddiad cyn bo hir ynglŷn â rhaglen cartrefi clyd Llywodraeth Cymru.
Mae’r ddeiseb, sy’n galw am atebion gwirioneddol fel inswleiddio cartrefi, rhagor o ynni adnewyddadwy, rhoi’r gorau i ddefnyddio tanwyddau ffosil a chymorth ariannol i’r rhai mewn angen, yn dangos bod yna gefnogaeth gref i’w chael ymhlith y cyhoedd i raglen cartrefi clyd uchelgeisiol.
Haf Elgar, Cyfarwyddwr Cyfeillion y Ddaear Cymru
Medd Haf Elgar, Cyfarwyddwr Cyfeillion y Ddaear Cymru:
“Dydyn ni ddim eisiau wynebu gaeaf arall fel yr un a gawson ni eleni. Ddylai neb orfod dewis rhwng gwresogi a bwyta. Mae angen inni helpu’r rhai sydd yn yr angen mwyaf. Trwy wneud ein cartrefi yn fwy ynni-effeithlon, bydd modd gostwng biliau a lleihau allyriadau carbon.
“Mae’r ddeiseb hon yn dangos i Lywodraeth Cymru cymaint o gefnogaeth a geir i atebion gwirioneddol a all ymdrin â’r argyfwng costau byw: inswleiddio cartrefi, rhagor o ynni adnewyddadwy, rhoi’r gorau i ddefnyddio tanwyddau ffosil a chymorth ariannol i’r rhai mewn angen.”
Trefnwyd y ddeiseb gan Climate Cymru gyda chymorth gan Gyfeillion y Ddaear Cymru, ac fe’i cyflwynwyd i Lywodraeth Cymru ar 30 Mawrth 2023.
